ម៉ាឡេស៊ី៖ សហព័ន្ធកីឡាបាល់ទាត់កូរ៉េខាងជើង​ បានជូនដំណឹងមកកាន់សហព័ន្ធកីឡាបាល់ទាត់អាស៊ី AFC ដោយបានស្នើសុំដកខ្លួនពីការប្រកួតជម្រុះជើងឯកបាល់ទាត់យុវជនអាស៊ីអាយុក្រោម ២៣ឆ្នាំ AFC U-23 Asian Cup ពូល K ដែលក្នុងពូលនោះមានតែបីក្រុមប៉ុណ្ណោះរួមមាន កម្ពុជា ជប៉ុន និងកូរ៉េខាងជើង។

ក្រោយពីការប្រកាសដកខ្លួនរបស់កូរ៉េខាងជើង AFC បានបញ្ចេញសេចក្តីសម្រេចថ្មីមួយ ដោយយកក្រុមចំនួន ២ មកពីពូល G H I និង J ដែលជាក្រុមមិនស្ថិតនៅ POT1 និងមិនមែនជាក្រុមម្ចាស់ផ្ទះសម្រាប់ប្រកួតវគ្គជម្រុះនាខែតុលាខាងមុខនេះ។ គួរបញ្ជាក់ផងដែរថា នៅក្នុង POT1 មានក្រុមអូស្រ្តាលី កូរ៉េខាងត្បូង ថៃ វៀតណាម កូរ៉េខាងជើង (ដកខ្លួន) ហើយដោយឡែកប្រទេសដែលជាម្ចាស់ផ្ទះវគ្គជម្រុះតំបន់អាស៊ីខាងក់ើតមាន ឥណ្ឌូណេស៊ី (ពូល G) សិង្ហបុរី (ពូល H) ឆាយនីសតៃប៉ិ (ពូល I) ម៉ុងហ្គោល (ពូល J)។

ដូច្នេះ ៨ ក្រុមដែលអាចចូលមកក្នុងពូល K ជាមួយកម្ពុជា និងជប៉ុន រួមមានចិន ព្រុយណេ ទីម័រខាងកើត ហ្វីលីពីន មីយ៉ានម៉ា ហុងកុង ម៉ាឡេស៊ី ឡាវ ខណៈការចាប់ឆ្នោតយកមួយក្រុមមកចូលក្នុងពូល K នេះនឹងធ្វើឡើងនៅថ្ងៃទី១១ ខែសីហាខាងមុខនេះ។

គួរបញ្ជាក់បន្ថែមថា សម្រាប់ការប្រកួតវគ្គជម្រុះ AFC U-23 Asian Cup ឆ្នាំ២០២២​នេះ នឹងធ្វើឡើងនៅថ្ងៃទី២៧ ដល់ថ្ងៃទី៣១ ខែតុលាខាងមុខនេះ ដោយក្នុងពូល K នេះ កម្ពុជា នឹងត្រូវធ្វើដំណើរទៅប្រកួតជម្រុះនៅកិឡដ្ឋាន Saitama ប្រទេសជប៉ុន៕